Pas publikimit të hulumtimit të TËVË1 mbi dyshimet për përfshirjen e një zyrtari policor në veri në aktivitete të lidhura me grupin e Millan Radoiçiqit, gazetari ynë, Venhar Isufi, që ka realizuar këtë storie është kërcënuar drejtpërdrejt.
Kërcënimi është bërë nga personi i përmendur në hulumtim dhe nga majori i tij në Policinë e Kosovës, duke tentuar të ushtrojnë presion ndaj gazetarit dhe redaksisë sonë.
Ky veprim është i papranueshëm dhe përbën sulm të drejtpërdrejtë ndaj lirisë së mediave dhe të drejtës së publikut për t’u informuar.
Në vend që të sqarohet apo të kundërshtohet me fakte përmbajtja e publikimit, është zgjedhur rruga e frikësimit – një praktikë e dëmshme dhe e rrezikshme për demokracinë dhe transparencën publike.
TËVË1 e dënon me vendosmëri çdo formë të presionit ndaj gazetarëve dhe kërkon nga Policia e Kosovës, Inspektorati Policor dhe Prokuroria e Shtetit që të ndërmarrin veprime të menjëhershme për hetimin e kërcënimeve dhe sigurimin e integritetit fizik e profesional të gazetarit tonë.
Ne nuk do të tërhiqemi nga misioni ynë për të raportuar me fakte dhe përgjegjësi.
Gazetarët e TËVË1 do të vazhdojnë të punojnë me përkushtim, pavarësi dhe guxim, duke i shërbyer interesit publik dhe transparencës. /teve1.info/
Ekskluzive – zyrtari policor në veri dyshohet se ka lidhje me grupin e Millan Radoiçiq
Polici që dyshohet për kontrabandim dhe lidhje me BIA-n serbe kërcënon ekipin e TËVË1
