U mblodhën mbrëmjen e së hënës.
Deputetët e Lëvizjes Vetëvendosje, bashkë me disa prej komuniteteve, morën pjesë në votimin e dy kandidateve, Feride Rushiti e Hatixhe Hoxha.
Në seancë ku të pranishëm ishin 64 deputetë, e në raundin e parë të votimit Rushiti mori 63 vota, përkundër që Kushtetuta parasheh që në këtë fazë të votojnë së paku 80 deputetë.
Këtë seancë po e shohin si shkelje të rëndë të rendit juridik e kushtetues nga Instituti i Kosovës për Drejtësi.
“Do të hyjmë në një situatë të ç’rregullt të anarkisë, në një situatë ku do të kemi një President që nuk është zgjedhur në mënyrë Kushtetuese, e dijmë aktgjykimin e vitit 2011 te rasti Pacolli, e dijmë edhe aktgjykimin te rasti i presidentit Thaçi, aty janë të skicuara dhe të vizatuara se si zgjidhet një president, në rundin e parë 80, në rundin e dytë 80, në raundin e tretë 61 vota në minimum, pra kështu ka paraparë Kushtetuta dhe këtë mund ta lexojë cilido qoftë”, ka thënë Jakaj.
Se ka shkelje e thonë edhe nga Grupi për Studime Juridike dhe Politike ku vlerësojnë se situata e krijuar është shqetësuese për institucionet.
“Me kushtet dhe rrethanat e seancës së djeshme është kërku me u mbajtë edhe sot, normalisht duke i bërë thirrje për pjesëmarrje edhe të opozitës, por normalisht në rast se vendoset dhe zgjedhet Presidenti në këto kushte ky vendim normalisht që do të jetë kundërkushtetues dhe normalisht që do të përfundojë në Gjykatën Kushtetuese me një interpretim që veçse e kemi të vitit 2011 dhe e dijmë pak a shumë epilogun sesi do të përfundonte kjo situatë”, theksoj Istrefi.
Nga GLPS theksojnë se për këtë situatë të krijuar fajtorë janë të gjithë deputetët e kësaj legjislature.
“Për shkak të mosvullnetit por edhe mos konkludimit në lidhje me zgjedhjen e emrave, propozimeve karshi pozitës së Presidentit. Kjo rrethanë ka qenë e njohur për ne gjatë muajve të fundit dhe është dashtë me u gjetë një mirëkuptim dhe me pasë bashkëpunim mes pozitës dhe partive opozitare për me ardhë në përfundim kushtetues në këtë rast”, ka thënë tutje Istrefi.
Në mungesë kuorumi, dy herë gjatë së martës ka dështuar zgjedhja e Presidentit, duke e shtyrë kështu seancën për në orët e mbrëmjes.
