Prokuroria Speciale e Republikës së Kosovës ka njoftuar se me urdhër të saj, janë ndaluar për 48 orë dy persona të dyshuar në kuadër të hetimeve që po zhvillohen për rastin “Pastrimi”.
Sipas njoftimit, të ndaluarit janë K.V. dhe F.V., të cilët dyshohen për përfshirje në disa vepra penale, përfshirë pjesëmarrjen ose organizimin e grupit kriminal të organizuar, kontrabandimin e mallrave në bashkëkryerje, dokumente të rreme lidhur me tatimin, shmangie nga tatimi, shpëlarje të parave, si dhe mbajtje në pronësi, kontroll ose posedim të paautorizuar të armëve.
Prokuroria ka bërë të ditur se ndalimi i tyre është pjesë e veprimeve procedurale hetimore që po zhvillohen në këtë rast.
Lidhur me të njëjtën çështje, më 1 korrik, autoritetet kishin arrestuar edhe nëntë persona të tjerë, ndërsa hetimet për rastin “Pastrimi” janë në vazhdim./teve1.info/
