Si rrallëherë, të pranishëm në sallën e gjyqit në Hagë, u paraqitën katër mbrojtësit kryesorë të katërshes së UÇK-së.
Ndërkohë që pjesëmarrja e Thaçit, Veselit, Krasniqit e Selimit, vazhdon të jetë përmes video lidhjeve.
Çështjen e tyre, gjykatësi i procedurës paraprake, po synon që t’ia dorëzojë trupit gjykues para fundvitit.
“Synoj të marrë vendim mbi kërkesat që më janë paraqitur deri tani për shqyrtim, por jo për kërkesa jo urgjente të cilat palët do t’i dorëzojnë nga dita e sotme deri në kalimin e çështjes së trupit gjykues, për të mos vonuar procedurat”, tha Nicolas Guillou, gjykatës i Procedurës Paraprake.
Avokati i Thaçit ngriti si çështje rivendosjen dhe zhvendosjen e dëshmitarëve të ZPS-së, për të cilat pretendon se prokuroria nuk po tregohet transparente.
“Ne e dimë që ZPS i ka zhvendosur dëshmitarët, e dimë që edhe në dhjetor të vitit 2020 zoti Smith u ka thënë diplomatëve se ka pasur 37 kërkesa për zhvendosje të dëshmitarëve, por, sa të tjerë janë bërë pas kësaj, çfarë shtysa u janë vënë dëshmitarëve për t’i nxitur të dëshmojnë?”, tha Gregory Kehoe, avokat i Thaçit.
Materialet e prokurorisë vazhdojnë të jenë kryetema në konferencat statusore.
Madje avokati i Veselit, potencoi materialet që vijnë nga qarqet serbe dhe ruse.
“Gjykata duhet të marrë vendim lidhur me materialet provuese që kanë të bëjnë me falsifikimet e shërbimit të inteligjencës së Serbisë, në dritën e çështjeve që u ngritën në seancë private dhe në këtë kërkesë do të përfshihen jo vetëm shërbimet e inteligjencës së Serbisë, por edhe Rusisë”, tha Ben Emmerson, avokat i Veselit.
Nga ana e Zyrës së Prokurorit të Specializuar u bë e ditur se janë edhe rreth 50 materiale shfajësuese që pritet t’iu dorëzohen ekipeve mbrojtëse.
Kronika e gazetares Florijeta Dernjani.
