Në shkollën fillore “Lidhja e Prizrenit” në Deçan, dyshohet se është kryer një akt i i cilësuar si “sulm seksual”.
Derisa nxënësja e klasës së shtatë po qëndronte në sallën sportive duke biseduar me mësimdhënësin, ky i fundit i cili ushtron profesionin e tij tash e 30 vite në lëndën e edukatës fizike, u filmua fshehurazi duke u afruar që ta puthë atë.
E derisa 13 vjeçarja po ballafaqohej me situatën e rëndë emocionale, 54 vjeçari po qëndronte me kolektiv në Shëngjin, atje ku edhe e mohoi rastin në prani të drejtorit të shkollës.
“Shkolla e ka festu ditën me datën 9 qershor, u kry festa, me datë 10 kemi udhëtu një pjesë e kolektivit në Shëngjin për tre ditë, ditën e diel pas mesnate më erdhi një video nga një prind i cili thotë shiko se cfarë ndodh në shkollën tuaj, e kontaktova një koleg dhe i thashë se kjo është e tmerrshme dhe e gdhiva mëngjesin i zgjuar nga ajo se cfarë pashë, pastaj e pash se videoja është në qarkullim, dhe e thirra profen në fjalë i cili ishte bashkë me ne i shqetësuar u pa qartë se diçka kishte edhe pse në një moment e mohoi, dhe kontaktova komandantin që ta verifikonte videon”, thotë Qazim Maloku- drejtor i shkollës.
Ai tregon se pse priti një natë për të lajmëruar rastin.
“Ishte nata, dhe e llogarita deri në mëngjes, pastaj prapë më erdhi videoja tjetër e njëjtë, nuk kam dështë me e fshehë dhe vetëm me e pa sepse nuk dukej qartë”, thotë Maloku.
Ndërkohë, zëdhënësi i Prokurorisë së Pejës, Shkodran Nikçi, tha se i pandehuri është arrestuar, derisa theksoi se Prokurori i Shtetit është duke përpiluar kërkesën për caktim të paraburgimit.
“Prokurori i shtetit ka shkuar personalisht ne stacion policor dhe fillimisht është lokalizu personi i dyshuar, më pas me urdhër të prokurorit është arrestuar dhe ndaluar për 48 orë dhe i është sekuestruar telefoni i tij, prokurori është duke përpiluar kërkesën për caktimin e paraburgimit…”, tha Nikçi.
E këtë rast e dënojnë edhe drejtoria e Arsimit në këtë komunë, derisa theksojnë se Selmanaj është suspenduar nga puna.
“Ne si drejtori e Arsimit e denojmë si rast , i kemi marrë të gjitha masat disiplinore ndaj mësimdhënësit duke e suspenduar nga puna sipas legjislacionit në fuqi. Rasti është duke u trajtuar nga organet kompetente të hetuesisë”, tha Besnik Hulaj -drejtor i Arsimit në Komunën e Deçanit.
Të pranishëm në shkollë në mesditën e së martes ishin edhe inspektorati i Arsimit, por të njëjtit nuk pranuan të prononcohen lidhur me rastin, meqë sipas tyre kanë dalë vetëm për të mbledhur informacione.
Ndryshe, lidhur me rastin reagoi edhe Ministrja e Arsimit, Shkencës, Teknologjisë dhe Inovacionit, Arbërie Nagavci, e cila dënoi ashpër sulmin seksual ndaj vajzës së mitur, derisa pret që organet e drejtësisë të marrin masat e duhura.
