Të akuzuarit për pengim dhe ndërhyrje në dëshmitarë, pas pranimit të fajësisë, Ismet Bahtijari dhe Sabit Januzi u dënuan me nga dy vjet burgim, kurse Haxhi Shala me tre vjet burgim.
Kjo shënon edhe rastin e parë në Gjykatë Speciale, ku prokuroria dhe mbrojtja arrijnë marrëveshje për pranim fajësie e lartësi dënimi.
Rrjedhimisht, ky rast penal vlerësohet se krijon precedent të ri në Speciale.
“Kanë krijuar një precedent të ri, të cilin nuk e ka pasur më herët Dhomat e Specializuara. Sigurisht që pas konsultimit me avokatë, të akuzuarit kanë ardhur në përfundim që ndoshta më mirë për ta është ta pranojnë fajësinë, për arsye se me rastin e pranimit të fajësisë, gjithmonë mundesh me negociu me lartësinë e dënimit”, ka thënë Amer Alija nga Fondi për të Drejtat Humanitare.
Përfitimi i këtyre tre të akuzuarve nga pranimi i fajësisë, konsiderohet se shpërfaqet në lartësinë e dënimit të shqiptuar.
“Tek shqiptimi i dënimit në këto raste palët negociojnë sanksionin penal, që është një dobi nga e cila i pandehuri përfiton, kur nga provat që ekzistojnë në shkresat e lëndës , nuk ka asnjë mundësi që të lirohet. Prandaj e shfrytëzojnë këtë mundësi ngase mund që të shkohet edhe në zbutje të dënimit”, thotë avokati Kadri Osaj.
Në Speciale po trajtohet edhe një rast tjetër për pengim dhe ndërhyrje në drejtësi, ku një aktakuzë të përbashkët është Hashim Thaçi, Bashkim Smakaj, Fahri Fazliu, Hajredin Kuçi e Isni Kilaj.
