Kryeministri i Kosovës, Albin Kurti nuk është paraqitur sot në Prokurorinë Speciale për të dhënë dëshminë e tij në rastin e rezervave shtetërore.
Lidhur me këtë, zëdhënësi i Qeverisë, Përparim Kryeziu, ka thënë se Kurti nuk mund të ishte i pranishëm sot për shkak se ai ndodhet jashtë vendit.
“Prokuroria Speciale, përkatësisht prokurorët e rastit janë njoftuar se për shkak që kryeministri është jashtë vendit me agjendë të konfirmuar kohë më parë, ai nuk mund të jetë i pranishëm sot sipas ftesës së prokurorisë. Megjithëkëtë, kryeministri Kurti ka shprehur gatishmërinë t’i mirëpres prokurorët e rastit në zyren e tij në një ditë dhe orë të dakorduar nga të dy palët për të përmbushur kërkesën e dalë nga ftesa e prokurorisë”, tha Kryeziu për Tëvë1.
Ndërsa, zëdhënësja e Prokurorisë Speciale, Liridona Kozmaqi, tha se Prokuroria Speciale konform legjislacionit në fuqi do ta përgatis një ftesë tjetër për kryeministrin Kurti për një datë tjetër.
Kryeministri Kurti, ishte ftuar nga Prokuroria Speciale të paraqitet sot në orën 09:30 në cilësinë e dëshmitarit, lidhur me rastin e rezervave shtetërore, në të cilin është e implikuar edhe ministrja e Industrisë, Ndërmarrësisë dhe Tregtisë (MINT), Rozeta Hajdari.
Ndërkohë, edhe numri i lëndës që gjendet në thirrjen dërguar kryeministrit përputhet me atë të rastit të rezervave shtetërore./teve1.info/
