Dy javë pasi iu drejtua Gjykatës Kushtetuese për Kuvendin e Kosovës e tërhoqi kërkesën.
Presidentja e vendit, Vjosa Osmani tha se kjo tërheqje erdhi pasi mori vesh se në lëndën e saj gjyqtar raportues është Radomir Llaban.
Për këtë çështje të mërkurën foli edhe kryeministri në detyrë, Albi Kurti.
Ai tha që shefja e shtetit nuk ishte në dijeni që në lëndën e saj që kishte dërguar për trajtim, detyra e raportuesit i ishte dhënë gjyqtarit Llaban.
Emërimin e këtij të fundit në pozitën e gjyqtarit, Kurti tha që nuk e ndaloi as ish presidenti Hashim Thaçi as ish kryetarja e Gjykatës Kushtetuese atë kohë, Arta RamaHajrizi.
“Ne që nga viti 2018 kemi qenë të informuar për gjyqtarin Radomir Llaban atëherë kur ai pat aplikuar që të behet anëtar i Gjykatës Kushtetuese. Deputetja e grupit tonë parlamentar, Albulena Haxhiu aso kohe i pat shkruar letër zyrës së presidentit. Fatkeqësisht as presidenti i atëhershëm në vitin 2018 as kryetarin e gjykatës kushtetues e atëhershme nuk e kanë për të arsyeshme që ta ndalin një proces të tillë sepse është absurde që dikush i cili sipas informacioneve që kemi nga institucionet tona të sigurisë është i papërshtatshëm dhe rrezik për rendin tonë kushtetues tash të gjykoj mbi një çështje kushtetuese”, ka thënë Kurti.
Tutje Kurti tha se po e pret vendimin e 8 gushtit të Gjykatës Kushtetuese dhe se të njëjtin do ta respektoj.
“Sa i përket aktgjykimit të Gjykatës Kushtetuese mendoj që duhet të presim edhe fare pak ditë. Në këtë javë do të na tregojnë se çfarë kanë menduar që duhet të ndodh pas 30 ditëve. Unë nuk e di se cila do të jetë zgjidhja natyrisht por ne kemi thënë se e respektojmë aktgjykimin e Gjykatës Kushtetuese. Është dëm i madh që Kosova nuk ka Kuvend, Kosova ka qeveri në detyrë”, është shprehur tutje ai.
Ndërkohë, tërheqjen e kërkesës nga Gjykata Kushtetuese e sheh si lojë politike të presidentes Osmani, ish kryetari i Gjykatës së Apelit, Hasan Shala.
Që kjo po bëhet për poenë politik e thotë edhe ish diplomati, Blerim Canaj.
Presidentja e vendit, Vjosa Osmani e ka dërguar kërkesën më 22 korrik në Gjykatën Kushtetuese, të njëjtën e tërhoqi më 5 gusht.
