Një numër i madh organizatash joqeveritare dhe mediash kanë reaguar ndaj Prokurorisë Themelore të Prishtinës, pas propozimit për dënim me gjobë ndaj anëtarëve të grupit famëkeq “AlbKings”, të cilët kishin ngacmuar gazetaren A.A.
Sipas tyre, marrëveshja e arritur me të pandehurit, e cila parasheh gjobë prej 2 mijë deri në 2 mijë e 500 euro, është “skajshëm minimale” dhe bie ndesh me ligjin.
“Nga ky njoftim kemi kuptuar se një grup prej tre ngacmuesish të gazetares dhe shumë vajzave të tjera, potencialisht viktima të grupeve pornografike në rrjetin ‘Telegram’, siç ishte grupi ‘AlbKings’, parashihet të dënohen vetëm me nga 2,500 euro gjobë, bazuar në një marrëveshje të paprecedentë të lidhur ndërmjet ngacmuesve dhe Prokurorisë së Prishtinës, e përfaqësuar nga prokurorja Elza Bajrami. Marrëveshja është konfirmuar edhe nga kryeprokurori i kësaj Prokurorie, Zejnullah Gashi”, thuhet në reagim.
Shoqëria civile thekson se ligji parashikon dënim deri në tre vjet burgim për këtë vepër, por prokuroria ka pranuar një zgjidhje “që nuk përmbush asnjë standard ligjor dhe etik”.
“Në këtë rast, Prokuroria ka trajtuar ngacmimin ndaj një gazetareje si një çështje të zakonshme dhe pa pasoja për të mirën publike. Dënime të tilla ndaj ngacmuesve të grave gazetare dhe ndjekësve të platformave pornografike… dëshmojnë mendësinë patriarkale të sistemit dhe vullnetin e prokurorëve për të mbyllur sytë para dhunës ndaj grave”, thuhet më tej.
Pas kritikave, Prokuroria Themelore e Prishtinës ka reaguar duke i cilësuar pretendimet e OJQ-ve si keqinterpretime.
“Prokuroria Themelore në Prishtinë ka përcjell me vëmendje reagimet në media lidhur me procedurën gjyqësore kundër të pandehurve për veprën penale ‘Ngacmimi’… Me qëllim të informimit të drejtë të publikut, njoftojmë se rasti i njohur ‘AlbKings’ është ndarë në dy pjesë: ndaj themeluesve dhe administratorëve të grupit dhe ndaj anëtarëve të identifikueshëm, të cilët nuk kanë pasur kompetenca administrative në grupin e hapur”, thuhet në reagim.
Sipas Prokurorisë, çështja ndaj themeluesve dhe administratorëve ka përfunduar me aktgjykim dënues, me burgime efektive, ndërsa anëtarët për të cilët bëhet fjalë kanë qenë vetëm komentues dhe persona që kanë kontaktuar me të dëmtuarën.
“Duke pasur parasysh faktin se vepra penale në fjalë është e dënueshme me gjobë ose me burgim deri në 3 vite, si dhe faktin se të pandehurit për herë të parë kanë kryer vepër penale dhe kanë pranuar fajësinë nga faza e parë… prokurori i shtetit ka vlerësuar se janë plotësuar kushtet ligjore për shqiptimin e një dënimi të tillë, i cili është aprovuar si i ligjshëm edhe nga Gjykata,” theksohet në reagim.
Prokuroria sqaroi se e dëmtuara është njoftuar për të drejtën e saj që të paraqesë kërkesë pasurore-juridike, por miratimi i saj për marrëveshjen nuk është i detyrueshëm.
“Prokurori i Shtetit nuk është i obliguar të kërkojë miratimin e palës së dëmtuar në lidhje me dënimin ndaj të akuzuarve, përveç obligimit për ta trajtuar kërkesën pasurore juridike,” thuhet në fund të reagimit të Prokurorisë Themelore të Prishtinës.
