Në Komunën e Shtërpcës, organet e rendit ndërmorën një aksion të koduar si “Brezovica”
Nën prangat e këtyre te fundit, përfunduan 10 persona.
Në mesin e tyre, ishte edhe ish-kryetari i kësaj komune, Bratislav Nikoliq.
Mbi këtë të fundit rënduan dyshimet se kishte përfituar mbi 1 milion euro nga dhënia e lejeve për ndërtimin e vilave në Brezovicë.
Ky aksion, u zhvillua në disa qytete si dhe u bastisën 10 lokacione.
Ndërsa në konferencën e Prokurorisë Themelore të Ferizajt, u tha se u ngrinë edhe miliona euro.
“Sot kemi zbatuar një urdhër në disa lokacione, 4 persona janë në kërkim pasi nuk janë gjetur në shtëpitë e tyre. Janë konfiskuar disa prova matertiale, vetura e armë. E rëndësishme është se gjatë zhvillimit të hetimeve prej 21 dhjetor deri më tani, nga të dhënat financiare që kemi siguruar, deri më tani kemi ngrirë afër 6 milionë euro”,
Ky rast, do të vazhdonte edhe me 6 janar të këtij viti.
Në këtë datë, Policia e Kosovës bastisi 9 lokacione në Ferizaj, Shtëpcë dhe Prishtinë.
Ndërsa nën pranga përfunduan edhe 10 persona të tjerë.
Kurse 2 muaj nga ky aksion, nën pranga përfunduan edhe 7 persona të tjerë në Ferizaj, Prishtinë, Skenderaj dhe Lipjan.
E villat për të cilën këta persona përfunduan nën pranga, vazhduan të inspektoheshin.
Kështu bëri të ditur Prokuroria Themelore e Ferizajt të mërkurën përmes një komunikate medie.
Po bëhen gati 8 muaj që kur kanë nisur hetimet, ndërkohë që për të njëjtin rast, inspektimet vazhduan edhe këtë të enjte.
“Qëllimi i këtij operacioni është identifikimi i ndërtimit të gjitha objekteve në zonat e mbrojtura të parkut kombëtar se në cilat zona janë ndërtuar ato, a posedojnë leje ndërtimore dhe të njëjtat a janë në pajtim me ligjin”, thuhet nw njoftimin e Prokurorisë.
Prokuroria ka njoftuar se pjesë e aksionit janë edhe Inspektorati i Ministrisë së Mjedisit, Departamenti i Mbrojtjes së Mjedisit, Inspektorati i Komunës, Drejtoria e Parkut Kombëtar “Sharri” dhe Agjencia Kadastrale e Kosovës.
Kronika e realizuar nga Fidan Zejnullahu
