Të prangosur u sollën në Gjykatore.
Edhe një herë, Blagoje Spasojeviq, Dushan Maksimoviq dhe Vladimir Toliq u deklaruan rreth fajësisë, për sulmin terrorist në Banjskë të Zveçanit.
“Nuk dëshiroj të deklarohem rreth akuzave”, tha i akuzuari Blagoje Spasojeviq.
“Sikurse herën e parë, nuk dëshiroj të deklarohem”, deklaroi i akuzuari Vladimir Toliq.
“Nuk jam fajtor për veprën që më vihet barrë për këtë aktakuzë”, tha i akuzuari Dushan Maksimoviq.
Ky deklarim i tyre erdhi pasi trupi gjykues pësoi ndryshime, për shkak të avancimit në Gjykatën e Apelit të ish kryetarit të trupit gjykues, Arben Hoti.
Në vendin e Hotit tash është ulur kryetari i Gjykatës Themelore të Prishtinës, Ngadhnjim Arrni.
Me këtë rast, palët u pajtuan që aktakuza, fjalët hyrëse si dhe veprimet e marra përgjatë procesit të konsiderohen të lexuara.
Në këtë seancë, mbrojtja e Vladimir Toliq kërkoi veçim të procedurës nga prokurori.
“Unë e thërras prokurorin special qe të ndryshojë këtë aktakuzë sepse mendoj se nuk është adekutate të vazhdojë procesi gjyqësor dhe ta akuzojë vladimir toliq për veprime konkrete. Ju kujtoj se këtu nuk po gjykohet milan radoiciqi por vladimir toliq, dushan maksimoviq dhe blagoje spasojeviq”, deklaroi avokati Millosh Deleviq.
E mbrojtja e Dushan Maksimoviq, propozoi dëgjimin edhe të nëntë dëshmitarëve të tjerë.
“Ditën kritike kanë qenë konstant me të akuzuarin Dushanit, në një vilë kur për disa vite me radhë shkojnë dhe bëjnë grill. Do të tregojnë se ku ka fjetur Dushani mes 23-24 shtatorit. Këta mund të në zbulojnë se ku kur dhe me kë ka qenë Dushani në kohën kur bazohet aktakuza”, tha avokatja Jovana Filipoviq.
Kjo u kundërshtua nga prokurori special.
Po ashtu, mbrojtja propozoi edhe dy ekspertiza, një për uniformë dhe një për armë.
Ekspertizat bashkë me propozimin që të dëgjohen nëntë dëshmitarë, u refuzuan nga trupi gjykues.
Seancat e radhës në rastin Banjska, u caktuan në muajin e ardhshëm, ku do të dëgjohet një dëshmitar i mbrojtjes, do të bëhet administrimi i provave materiale dhe do të bëhet deklarimi i të akuzuarve.
