Një ditë më parë dolën para Gjykatës.
E aty u shfaqën edhe prova që dëshmojnë se për sulmin në Banjskë ishin kryer një sërë përgatitjesh.
Ndaj Blagoje Spasojeviq, Vladimir Toliq dhe Dushan Maksimoviq u kërkua burgim për jetë.
Kjo masë e dënimit vlerësohet se është pika kulminante e gjithë procesit të përfaqësuar nga Prokuroria Speciale.
“Prokurori ka arrit me argumentu rrezikshmërinë e këtij grupi terrorist, ka arritur ta dëshmojë me prova. Gjithashtu e ka elaboru në mënyrë të shkëlqyer në fjalët përfundimtare veprimet individuale dhe grupore të kryerësve, sepse ata kanë vepruar si një strukturë e organizuar, që kanë hyrë nga një territor i një shteti tjetër, ku qëllimi është i qartë, të armatosur me armë luftarake. Nuk mund të besoj se trupi gjykues do të gjejë ndonjë element lehtësues tek rasti i tyre” , shprehet avokati Skender Musa.
Çdo vendim i shqiptuar nga Gjykata besohet se duhet të jetë preventivë për persona të tjerë.
“…Për këta të tjerët që nesër mendojnë ose do të veprojnë kundër rendit kushtetues të Kosovës, me veprime terroriste, do t’i gjejë e njëjta gjë. Pra, konsideroj se më shumë do të ketë efekt ndaj personave të tjerë që nesër mos të ndodhë kjo, mos të përsëritet më akti terrorist sikurse ka qenë në Banjskë”, thotw Hasan Shala, ish-kryetar i Gjykatës së Apelit.
Të hënën e javës së ardhshme, me dhënien e fjalëve përfundimtare të ekipeve mbrojtëse të të akuzuarve, do të shënohet edhe fundi i këtij gjykimi.
