Numri i qytetarëve që kanë kërkuar ndihmë mjekësore për shkak të simptomave gastrointestinale në Han të Elezit ka arritur në 110, ndërsa institucionet shëndetësore janë në pritje të rezultateve laboratorike që do të përcaktojnë shkakun e rasteve të raportuara.
Drejtoresha për Shëndetësi në Komunën e Hanit të Elezit, Kimete Kuka Hasallari, bëri të ditur se rastet janë regjistruar në Qendrën Kryesore të Mjekësisë Familjare (QKMF) nga 13 korriku e deri më tani.
“Së bashku me rastet e dyshuara për helmim ushqimor, në këtë numër përfshihen edhe pacientë me simptoma të ngjashme, të dyshuara me origjinë virusale”, ka deklaruar Kuka Hasallari.
Ajo sqaroi se, menjëherë pas paraqitjes së rasteve të para të dyshuara për helmim, ku pacientët kishin raportuar se kishin konsumuar ushqim në lokale të ndryshme, janë njoftuar institucionet kompetente.
“Është njoftuar Qendra Rajonale e Shëndetit Publik dhe, së bashku me inspektorët e Agjencisë së Ushqimit dhe Veterinarisë, janë kryer inspektime në dy biznese. Gjatë kontrolleve janë marrë mostra nga mjetet e punës, enët e shërbimit dhe ushqimi për analiza laboratorike”, ka thënë ajo.
Sipas Kuka Hasallarit, rezultatet e analizave pritet të ndihmojnë në përcaktimin e shkakut të rasteve të dyshuara dhe në ndërmarrjen e veprimeve të mëtejshme nga institucionet përgjegjëse.
“Të gjithë pacientët po marrin trajtimin e nevojshëm sa më shpejt që është e mundur. Falënderojmë stafin shëndetësor për përkushtimin dhe kujdesin maksimal në menaxhimin e kësaj situate”, është shprehur ajo.
Në fund, drejtoresha u bëri apel qytetarëve që, në rast të shfaqjes së simptomave si të vjella, diarre, dhimbje barku apo temperaturë, të kërkojnë menjëherë ndihmë në institucionet shëndetësore.
