E për këtë, drejtori Ekzekutiv i Grupit për Ballkanin, Naim Rashiti, në emisionin “ResPublika” ka thënë se kjo nismë ka lindur si pasojë e dështimit të procesit integrues të Ballkanit në BE.
“Pritjet nga Procesi i Berlinit kanë qenë shumë të mëdha. Dhe në momentin kur i ke parë liderët e BE-së, Merkel, Macron me liderët e Ballkanit Perëndimor në tavolinë të përbashkët janë pritur që do të ketë agjenda shumë të mëdha. Por formati ishte i suksesshëm sepse uleshin të gjithë të barabartë në tavolinë. Ballkani i Hapur është rezultat i dështimit të procesit integrues. Ballkani i hapur është rezultat i vonesave të rezultateve të Procesit të Berlinit. Ballkani i Hapur titull mori një muaj pasi Maqedonisë së Veriut iu vendos veto. Po të kishin filluar negociatat (për anëtarësim në BE) me Maqedoninë e Veriut dhe Shqipërinë nuk do të kishte Ballkan të Hapur. Dhe shumë është e sigurt kjo punë”, ka deklaruar Rashiti.
Sipas tij, pamundësia për të parë një rrugë tjetër integruese Shtetet e Bashkuara të Amerikës, e kanë përkrahur “Open Ballkan”, por jo vetëm me tre shtete.
“Dhe Ballkani i Hapur u zhvillua në periudhën kur kishte fjetje, apo shuarje shprese për zgjerim dhe kur kishte një gjumë të agjendave të Procesit të Berlinit. Dhe këtu vjen përkrahja amerikane për Ballkanin e Hapur sepse nuk kishte një agjendë tjetër. Erdhi sepse nuk kishte Proces të mirëfilltë të Berlinit. Ky është rezultat. E tani ka një qëndrim amerikan që duan ta mbështesin Ballkanin e Hapur, jo me këtë treshe (Serbi, Maqedoni, Shqipëri). Dhe në këtë situatë Kosova dhe vendet tjera duhet ta testojnë Ballkanin e Hapur… Dhe kam shumë pak shpresa se do të derivojë diçka përmbajtjesore nga Ballkani i Hapur”, ka theksuar Rashiti. /teve1.info/
