Kandidati i Partisë Demokratike të Kosovës për kryetar të Komunës së Gjilanit, Riad Rashiti, ka deklaruar se synimi i tij është ta rikthejë Gjilanin në rrugën e zhvillimit dhe të ndërtimit të qëndrueshëm.
Në emisionin “Mesditë” në Tëvë1, Rashiti tha se kandidatura e tij është rezultat i një vlerësimi të bërë nga struktura e partisë, pas analizës së situatës politike dhe zhvillimore në Gjilan.
“PDK-ja e ka menduar dhe e ka vlerësuar situatën në Gjilan, ku ka vendosur që unë të jem kandidati për të garuar në këto zgjedhje të rëndësishme komunale. Jam prej kohësh në politikë, e njoh mirë Gjilanin, i njoh mirë mundësitë, problemet dhe potencialin që ka qyteti ynë,” tha Rashiti.
Ai shtoi se Gjilani ka mbetur pas në shumë aspekte dhe se qëllimi i tij është të sjellë një qeverisje të re, më profesionale dhe të përgjegjshme.
“Kemi mbetur njëra prej komunave më të prapambetura në çdo aspekt. Gara ime është për ta provuar një qeverisje më të përgjegjshme, profesionale, që e kthen Gjilanin në kahun e duhur – në rrugën e ndërtimit dhe zhvillimit,” u shpreh Rashiti.
Gjatë diskutimit, kandidati i PDK-së kritikoi qeverisjen aktuale komunale, duke theksuar mungesën e investimeve dhe mosshfrytëzimin e fondeve publike gjatë mandatit të fundit.
“Në Gjilan, për këto katër vite, nuk ka pasur investime në sektorin privat. Komuna është dashur t’u hapë rrugë investitorëve, por nuk ka pasur as investime nga diaspora, as nga donatorët, e as implementim të projekteve nga Qeveria e Republikës së Kosovës,” tha Rashiti.
Sipas tij, mungesa e menaxhimit efikas ka bërë që miliona euro të mbeten të pa shfrytëzuara:
“Në çdo debat kam theksuar se janë rreth 149 milionë euro që kanë mbetur të pashfrytëzuara gjatë këtyre katër viteve. Kjo është një humbje e madhe për qytetin tonë,” përfundoi Rashiti.
