Ministri për Kthim dhe Komunitete, Nenad Rashiq, është skepktik për mbajtjen e zgjedhjeve në veri.
Ai ka deklaruar se nuk janë rrethanat sipas tij për këtë proces, duke thënë se pala negociatore e Serbisë në dialog është duke u munduar që këtë gjë mos ta lejojë.
“Unë besoj në demokraci dhe kam dëshirë që të gjithë banorët serbë të veriut të marrinë pjesë në zgjedhje. Nuk e shoh që në këto momente është e mundshme mbajtja e zgjedhjeve. Përkundrazi, unë e shoh se nga aspekti i pushtetit në Beograd ose kryenegociatorët e dialogut ose negociatorët, nuk e kanë për qëllim përshpejtimin e mbajtjes së zgjedhjeve, qoftë rrethanave politike, qoftë një motivi që na sjellë marrëveshjen përfundimtare. Në këtë moment jam skeptik për mbajtjen e zgjedhjeve në veri”, ka thënë Rashiq.
Tutje, Rashiq, ka bërë thirrje për lirimin e drejtorit të Administratës në Komunën e Leposaviqit, Nikolla Radimiroviq.
Rashiq ka thënë se janë duke punuar në mbrojtjen e Radimiroviqit.
“Duhet ta mbrojmë Nikolla Radimiroviqin, jam në kontakt me zëvendësin tim që merret me këtë, që ta gjejmë ndihmën adekuate juridike për të që sa më shpejtë të dalë nga kjo gjendje”, tha Rashiq gjatë një konference për media.
Tutje, Rashiq ka bërë të ditur se mban informacione që drejtori i Administratës do të mbahet në paraburgim deri të hënën.
“Sipas informacioneve do të jetë aty së paku deri të hënën pasi gjyqtari nuk është aty dhe kur të vijë të hënën do të merret me rastin. Po guxoj të supozoj që kjo është një prej pjesës metodologjisë shantazhuese”, ka thënë ai.
