Deputeti i zgjedhur nga radhët e komunitetit serb, Nenad Rashiq, ka lënë të hapur mundësinë që të jetë pjesë e kabinetit të ri qeveritar, duke shprehur pritshmëri pozitive për postin e ministrit për Komunitete dhe Kthim.
Në një prononcim për media para nisjes së seancës konstituive të Kuvendit të Kosovës, ai tha se ende nuk është bërë prezantimi zyrtar i përbërjes së qeverisë nga kryeministri, por rikujtoi se në dy mandate të mëparshme ka qenë i propozuar për të njëjtën ministri.
Rashiq u shpreh se do të mbështesë propozimet që paraqiten si pjesë e marrëveshjes politike, përfshirë edhe kandidatët për nënkryetarë të Kuvendit.
Ai theksoi se votimi duhet të shihet si një proces i përbashkët dhe se vendimet e Gjykatës Kushtetuese duhet të respektohen nga të gjithë.
Sipas tij, kandidatura për kryetare të Kuvendit pritet t’i takojë Albulena Haxhiut.
“Ende nuk kemi dëgjuar kryeministrin kur e bën prezantimin e kabinetit qeveritar por sigurisht dy herë më parë kam qenë i propozuar për ministër të Ministrisë për Komunitete dhe Kthim. Kandidate për kryetare të Kuvendit të Kosovës do të jetë Albulena Haxhiu. Do të votoj cilindo kandidat për nënkryetar të Kuvendit të Kosovës kur të vijë në pako dhe jo vetëm unë por secili. Gjykatën Kushtetuese duhet ta respektojmë”, ka thënë Rashiq.
