Raporti i Qeverisë me Sindikatën e Bashkuar të Arsimit, Shkencës dhe Kulturës (SBAShK), po vlerësohet si i zbehtë. Madje komunikimi ndërmjet këtyre dy institucioneve mungon në masë të madhe. Ekspertët e arsimit në vend po vlerësojnë se ky mosbashkëpunim lë pasoja në procesin e mësimdhënies e mësimenxënies.
Rinor Qehaja, drejtor i Institutit “EdGuard”, ka thënë se organizimi sindikal është e drejtë e garantuar se SBAShK-u duhet të jetë adresa e vetme ku mësimdhënësit në vazhdimësi luftojnë për të drejtat e tyre.
Sipas tij, SBAShK-u duhet që të jetë më shumë i organizuar në mënyrë që të mos të përqendrohet vetëm te pagat, por edhe vështirësitë e tjera që përballen punëtorët e arsimit.
Ai ka shtuar se në prag të fillimit të vitit të ri shkollor, komunikimi do të duhet që të rritet në mënyrë që të sigurohet mirëqenia e mësimdhënësve në vend të punë dhe të jetësohen reformat.
“Organizimi sindikal është inkurajuar edhe ligjërisht në vendin tonë dhe si i tillë shpresoj shumë që edhe SBAShK-u të jetë ajo adresa e vërtetë që në vazhdimësi lufton për të drejta më të mira në vende të punës për komunitetin e mësimdhënësve që jo gjithherë janë kufizuar në paga. Ajo që do të doja të shihja është një SBAShK më shumë të organizuar që do të ngrehte zërin për shumë tema dhe vështirësi që mësimdhënësit tanë i kanë në vendin e tyre të punës”.
“Nga ajo çka prezantohet në opinion ka një komunikim shumë të reduktuar mes Ministrisë së Arsimit dhe sindikatës në këtë rast që do të duhej që të ndryshonte. Jam shumë i bindur që më afrimin e fillimit të vitit të ri mësimor, një komunikim shumë më i shpeshtë të komunitetit të mësimdhënësve dhe ministrisë është i domosdoshëm në një mënyrë që jo vetëm të sigurohet mirëqenia e mësimdhënësve në vend të punë, por më e rëndësishmja që në koordinim me mësimdhënësit të jetësohen ato reforma të shumta në politika të prezantuara”, është shprehur ai për EO.
Argjend Osmani, njohës i çështjeve të arsimit, ka thënë se nëse vazhdon ky trend i zbehjes së raporteve do të ketë pasoja të mëdha.
Sipas tij, Qeveria duhet të jetë në krye të detyrës dhe të gjejë zgjidhje për problemet e grumbulluara në arsim. Ai kërkon ulje të tensioneve nga të dyja palët, duke shtuar se ende ka punë për të ngritur cilësinë në arsim.
“Raporti mes SBAShK-ut dhe Qeverisë mendoj se është shumë i zbehtë dhe mendoj që kjo i kalon tashmë pasojat e veta, por nëse vazhdon në këtë trend do të ketë edhe pasoja të tjera negative. Qeveria duhet që të jetë në krye të detyrës dhe përgjegjësisë që ka, të mos harrojmë që janë aty për t’i shërbyer publikut prandaj edhe duhet që të gjejnë zgjidhje për problemet e grumbulluara në arsim e që padyshim çështja e pagesës së mësimdhënësve dhe mbrojtja e të të drejtave të mësimdhënësve që ndërlidhet me angazhimin e sindikatës është një çështje shumë e ndjeshme të cilën duhet ta trajtojnë me prioritet”, ka deklaruar ai.
