Në Raportin e Progresit të vitit 2023 për Kosovën, fokus i veçantë i është dhënë edhe Kuvendit të Kosovës.
Ky raport edhe këtë vit ka adresuar disa kritika për Institucionin Legjislativ.
Aty thuhet se ky vit u karakterizua me mungesë të kuorumit vendimmarrës, konsensusit mes pushtetit dhe opozitës, grumbullim i pikave në seanca, bojkot të Listës Serbe, si dhe diskutimet e tensionuara e gjuha nxitëse.
“Mungesa e kuorumit vendimmarrës, pavarësisht se Qeveria e ka shumicën në Kuvend, çoi në një numër të madh pikash në rendin e ditës dhe seancat parlamentare zvarriten me muaj të tërë, duke shkaktuar vonesa në miratimin e reformave të lidhura me BE-në dhe në bërjen e emërimeve”, thuhet në raport.
Bojkoti i deputetëve të pushtetit, po shihet si shqetësues edhe nga monitoruesit e legjislativit.
Naim Jakaj, nga Instituti Kosovar për Drejtësi vlerëson se kjo nuk do duhej të ndodhte për shkak se duhet miratuar ligje në interes të vendit.
Sipas tij, ndaj këtyre deputetëve do të duhej ndërmarrë masa, përfshirë edhe në mëditjet e tyre.
Edhe Kenan Gashi nga rrjeti i organizatave joqeveritare AVONET, thekson se me këtë veprim deputetët po shkelin detyrat për të cilat janë të thirrur.
Po ashtu, disa nga gjetjet e Raportit thonë se diskutimet mes mazhorancës dhe opozitës ishin të polarizuara e të tensionuara, madje u përdor edhe gjuhë nxitëse por edhe seksiste.
