Pajisja me vetura inteligjente të Policisë së Kosovës ka ngritur dyshimin për keqpërdorimin e pozitës nga zyrtarët policorë.
Kjo pasi që një raport i Inspektoratit Policor të Kosovës për përdorimin e teknologjisë nga ta, ka vënë në pah se ka dobësi në pasqyrimin e të dhënave në gjoba në raport me shkeljet.
“Shpejtësia e lëvizjes së mjetit e përshkruar në gjobë është më e ulët se ajo e regjistruar në radar (në 55 nga 84 mostra/gjoba). Shpejtësia e kufizuar në radar ndryshon nga ajo e regjistruar në gjobë (në 23 nga 84 mostra). Lloji i shkeljes në gjobë ndryshon nga ajo e matur me radar (në 3 nga 84 mostra). Shqiptohet gjobë për tejkalim të shpejtësisë në bazë të një neni (paragrafi) jo adekuat të ligjit”, thuhet nga IPK.
Bazuar në këtë IPK ka rekomanduar trajnime shtesë për zyrtarët policorë, ushtrim më të madh të kontrollit mbi ekipet patrulluese në drejtim të eliminimit të praktikave të dëmshme si ndryshimi i llojit të shkeljes ose mos aplikimi i plotë i gjobës.
Autoriteti mbikëqyrës, ka kërkuar nga eprorët që të monitorojnë procesin e shkarkimit të materialeve të regjistruara nga pajisjet e matjes së shpejtësisë, duke siguruar që ato ruhen në mënyrën e duhur.
“IPK i rekomandon Udhëheqësit të Divizionit të Trafikut Rrugor dhe shefave të njësive rajonale të trafikut rrugor, që të ndërmarrë veprime në drejtim të aplikimit të praktikës së printimit të kundërvajtjeve, në rastet e matjeve me radar të dorës Trucam nga njësitë patrulluese. IPK i rekomandon Udhëheqësit të Divizionit të Trafikut Rrugor, që në bashkëpunim edhe me Ministrinë e linjës, të shqyrtojë mundësitë e pajisjes edhe me radar statik, për të ushtruar kontroll efektiv mbi kundërvajtësit në zona me rrezik të lartë, të njohura si pika të nxehta të ndodhjes së aksidenteve rrugore”, është thënë nga IPK.
Po ashtu një ndër gjetjet ishte se gjobat e shqiptuara me pajisje inteligjente dëshmohen me foto të cilat printohen në printer mobil, kjo nuk ndodhë me gjobat që shqiptohen pas matjeve me radar të dorës.
Derisa aty thuhet se njësitë e trafikut nuk po shfrytëzojnë sa duhet mundësitë që ofrojnë automjetet me këto pajisje dhe se duket sikur ka hezitim apo mungesë gatishmërie.
Tëvë1 ka pyetur Policinë e Kosovës për këto gjetje të këtij raporti, por që deri në publikim të kronikës nuk ka pasur përgjigje.
