Drejtoria e Policisë së Kryeqytetit, po përballet me mangësi në trajtimin e rasteve të dhunës në familje.
Një raport i Inspektoriatit Policor të Kosovës, ka zbuluar se sikurse Prishtina, edhe disa stacione të tjera policore, ende nuk kanë funksionalizuar ekipe të hetimeve të dhunës në familje, nuk kanë plotësuar vendet e punës në disa prej ekipeve, si dhe kanë mungesë të funksionalizimit të dhomave mike në disa prej tyre.
Në raport theksohet se janë evidentuar dobësi që pasqyrojnë mungesë të raporteve njoftuese për Prokurorinë mbi dyshimet e arsyeshme të kryerjes së veprës penale.
“Mosaplikim të vlerësimit të rrezikut për viktimat sipas standardit. Mungesë të pakove të viktimave. Mungesë të raporteve ditore për rastet e dhunës në familje. Mosrespektim i zinxhirit komandues gjatë procedimit të kallëzimeve penale.Sa i përket treguesve statistikor janë evidentuar: rënie të numrit të të ndaluarve në raport me numrin e rasteve, rënie të prezencave të mbrojtësve të viktimave dhe zyrtarëve të Qendrave për punë sociale”, thuhet nga IPK-ja.
Këto të gjetura, ish-drejtori i Policisë thotë se janë të arsyeshme, dhe që mund të evidentohen nga ky institucion.
“Hetimi i çdo rasti duhet të ketë edhe planin e hetimit, duhet të ketë edhe të gjitha shkresat e dosjes sepse në të gjitha rastet kur më vonë ato raste përfundojnë në Prokurori dhe në Gjykatë, shumë prej atyre rasteve edhe po dështojnë. Lëshimet që po bëhen në fazën fillestare dhe nuk janë të plotësuar dhe nuk janë të hetuar ashtu siç duhet dhe nuk janë të pajisur me të gjitha shkresat e lëndës, Gjykata nuk i merr për bazë dhe rasti mbetet po them i dështuar”, deklaroi ish-drejtori i Policisë, Reshat Maliqi.
Kurse ish-shefi i hetimeve në IPK, Jetullah Aliu, thotë se në raportin e publikuar janë adresuar kryesisht probleme sistemore.
“Ky raport është shumë profesional në mandatin dhe rolin mbikqyrës që ka Inspektorati Policor i Kosovës ndaj Policisë së Kosovës dhe fokusi kryesor ndaj këtyre të gjeturave dhe rekomandimeve nga ana e këtij raporti nga IPK duhet t’i shërbejë me qëllim që të kenë hetime më proactive të jenë më inteligjente dhe të jenë në koordinim me Prokuorinë e Shtetit dhe të ketë trajnime shtesë”, deklaroi ai.
Në këtë raport, IPK u ka rekomanduar shefave të sektorëve të hetimeve dhe mbikqyrësve të ekipeve të hetimeve që të ushtrojnë kontroll të shtuar mbi hetuesit që trajtojnë rastet e dhunës në familje.
Rekomandim të njëjtë kanë edhe për ata në kuadër të stacioneve policore, për t’u siguruar që gjatë intervistimit të palëve, u parashtrohet numër më i madh pyetjesh lidhur me rastet dhe intervistat të përfshijnë edhe dëshmitarë tjerë potencialë që mund t’i kontribuojnë zbardhjes.
