Mohammad al-Halaq, një djalë 9-vjeçar nga ar-Rihiya në jug të Hebronit, u vra më 16 tetor të vitit të kaluar pasi u qëllua nga një ushtar izraelit ndërsa luante futboll me fëmijë të tjerë në oborrin e një shkolle.
Nëna e tij, Aliyah, kujtoi se pak orë para vdekjes, djali ishte i lumtur pasi kishte marrë një çantë të re shkolle me logon e UNICEF-it.
“Ai ishte jashtëzakonisht i lumtur. Ishte diçka e pazakontë që i dhanë një çantë”, tha ajo. “Ai erdhi duke trokitur në derë për të më thënë se kishte këtë çantë të re për të futur lapsa dhe stilolapsa”.
Sipas dëshmitarëve, Mohammad u qëllua gjatë një operacioni ushtarak izraelit, ndërsa fëmijët u shpërndanë pasi në zonë mbërritën automjete ushtarake. Ai ndërroi jetë më vonë në spital.
Sipas të dhënave të cituara në raport, Mohammad është një nga 235 fëmijët dhe adoleshentët palestinezë të vrarë nga forcat izraelite në Bregun Perëndimor, si edhe pesë të tjerë të vrarë nga kolonët, që nga 7 tetori 2023.
Organizata izraelite për të drejtat e njeriut B’Tselem publikoi raportin “Fëmijëria e Pambrojtur”, i cili dokumenton 54 fëmijë dhe adoleshentë palestinezë të vrarë vetëm gjatë vitit 2025.
“Vrasja e përhapur dhe e paprecedentë e fëmijëve dhe adoleshentëve palestinezë në Bregun Perëndimor është rezultat i politikës më të gjerë të Izraelit që lejon vrasjen e palestinezëve pa përgjegjësi”, tha drejtoresha ekzekutive e B’Tselem, Yuli Novak.
“Sistemi jo vetëm që mbështet autorët e vrasjeve – por në fakt u jep atyre një licencë për të vrarë”, shtoi ajo.
Raporti kundërshton deklaratat e komandantit të Komandës Qendrore të ushtrisë izraelite, gjeneralmajorit Avi Bluth, i cili kishte pretenduar se “96% e të vrarëve ishin të përfshirë në terrorizëm”. B’Tselem e cilësoi këtë si një “gënjeshtër të hapur”, duke theksuar se nuk gjeti prova që ndonjë nga të miturit e vrarë gjatë vitit 2025 të kishte qenë pjesë e grupeve militante ose të përbënte kërcënim.
Nga ana tjetër, një zëdhënës i Forcave të Mbrojtjes së Izraelit (IDF) deklaroi se ushtria nuk “kishte shënjestruar qëllimisht civilë të papërfshirë”.
“Çdo pretendim për dëmtim të individëve të papërfshirë shqyrtohet dhe hetohet”, tha zëdhënësi i cituar nga Guardian.
“IDF dhe forcat e sigurisë së Izraelit do të vazhdojnë të veprojnë për të penguar terrorizmin dhe për të mbrojtur qytetarët e Izraelit, duke mbetur të përkushtuar ndaj ligjit izraelit dhe ndërkombëtar dhe duke marrë masa për të zbutur dëmin ndaj civilëve sa herë që është e mundur.”
Sipas organizatës Yesh Din, që nga tetori i vitit 2023 nuk është ngritur asnjë aktakuzë ndaj një shtetasi izraelit për vrasjen e një palestinezi.
Ndërkohë, një komision i pavarur hetimor i OKB-së deklaroi javën e kaluar se “Autoritetet dhe forcat e sigurisë izraelite kanë synuar qëllimisht fëmijët palestinezë, duke rezultuar në gjenocid, krime kundër njerëzimit dhe krime lufte në Rripin e Gazës dhe krime lufte në Bregun Perëndimor.”
“Provat tregojnë se fëmijët palestinezë janë shënjestruar dhe vrarë qëllimisht nga forcat izraelite të sigurisë”, tha kryetari i komisionit, Srinivasan Muralidhar.
Raporti përmend edhe raste të tjera, përfshirë Rimas Amurin, 13 vjeç, e cila u vra pranë shtëpisë së saj në kampin e refugjatëve në Jenin, si dhe Layla al-Khatib, 2 vjeç, e cila u qëllua për vdekje brenda shtëpisë së saj ndërsa ishte ulur në prehrin e nënës.
