Kryetari i Aleancës për Ardhmërinë e Kosovës, Ramush Haradinaj, ka komentuar aktgjykimin e Gjykatës Kushtetuese që i jep deputetëve afat 30 ditësh për konstituimin e Kuvendit dhe ka bërë thirrje për gjetjen e një zgjidhjeje para mbajtjes së seancës së ardhshme parlamentare.
Në një prononcim për media, Haradinaj tha se AAK është e gatshme të japë votat për të zgjidhur çështjen e kandidaturës për kryetar të Kuvendit, por paralajmëroi rrezikun që seanca të vazhdojë në mënyrën e njëjtë si më parë, duke krijuar një cikël të pafund bllokadash.
“Është mirë të gjejmë zgjidhje para seancës, nëse vazhdojmë hyjmë në ciklin e pafund. Situata është e lidhur me faktin nëse do të vazhdojmë sikur të mos ketë ndodhur asgjë,” tha Haradinaj.
Ai shtoi se nëse arrihet marrëveshja për kandidaturën, me 6 votat e Aleancës mund të kryhet puna në seancë.
“Rreziku më i madh është që të hyjmë në seancë me të njëjtën situatë pas vendimit të gjykatës, që do ta bënte të kotë edhe thirrjen për takim,” paralajmëroi ai.
Haradinaj theksoi se ndryshimi i mënyrës së votimit në Kuvend është një precedent i ri dhe se Aleanca vlerëson se tashmë janë krijuar kushtet për kthimin e votës së hapur.
“Në vendim është përcaktuar koha prej 30 ditësh për konstituim, por deri më tani ka ndodhur e kundërta. Këtë herë është ndryshuar praktika e votimit, që është një precedent. Si Aleancë, vlerësojmë se tashmë janë krijuar kushtet për të kthyer votën e hapur,” tha ai.
