Kryetari i Komunës së Drenasit, Ramiz Lladrovci, ka reaguar pas rezultateve që e nxjerrin atë fitues të garës për këtë komunë, duke e quajtur fitoren “triumf të qytetarëve kampion”.
“Qytetarët kampionë u përcaktuan për kryetarin kampion! Krenar me ju, qytetarë të Drenasit – qytetarë të zemrës së Kosovës!”, ka shkruar Lladrovci.
Ai tha se kjo fushatë ishte e vështirë për të dhe për qytetarët, por besimi në rrugën e drejtë e solli rezultatin e dëshiruar.
“E di se e jetuat dhe e përjetuat këtë fushatë ndoshta më rëndë se unë dhe familja ime, por ne e dinim se ishim në rrugën e drejtë, prandaj fituam”, theksoi ai.
Lladrovci shtoi se fitorja në Drenas ka befasuar “amatorët politikë”, por jo qytetarin dinjitoz të komunës, duke e cilësuar rezultatin si “befasi të këndshme”.
“Kemi marrë më shumë vota ‘Për Drenasin Kampion’ se PDK në Skenderaj. Drenasi është zemra e Kosovës. Krenar me të gjithë qytetarët – vazhdojmë me qeverisjen e mirë, transparente e llogaridhënëse”, përfundoi Lladrovci.
