Kampionia e Kosovës në futboll, Drita e Gjilanit, ka njoftuar për shkarkimin e Zekirija Ramadanit nga pozita e trajnerit.
Njoftimin për largimin e Ramadanit, Drita e ka bërë të ditur të martën. Në fakt, Ramadani ka ndërprerë punën e tij te Drita para katër ditësh. Ai u shkarkua të premten, ndërsa vetëm të martën Drita bëri të ditur largimin e trajnerit shkupjan.
“Ndërprejmë bashkëpunimin me kryetrajnerin Zekirija Ramadani. Klubi ynë shpreh mirënjohjen më të thellë për bashkëpunimin e shkëlqyer gjatë më shumë se dy vjetëve e gjysmë me trajnerin Ramadani. Bashkëpunimi ynë ishte i jashtëzakonshëm dhe sukseset që arritëm së bashku do të mbeten përgjithmonë pjesë e historisë së klubit tonë. Titujt kampion dhe arritjet e jashtëzakonshme në arenën ndërkombëtare janë dëshmi e punës kolosale që kemi bërë së bashku. FC Drita e falënderon Zekën për gjithçka që ka dhënë për klubin tonë, duke besuar se rrugët që ndërtuam së bashku mund të na bashkojnë sërish në një moment tjetër”, shkruan në njoftimin e Dritës.
Ai kishte kontratë deri në verën e vitit 2027, dhe tani përkohësisht do të zëvendësohet nga Visar Sermaxhaj në krye të Dritës.
Ramadani e ka drejtuar Dritën drejt dy titujve rresht të kampionit të Kosovës dhe në kampanjën historike në Ligën e Konferencës.
Drejtimin e Dritës e mori në vitin 2023, pas aventurës në Arabinë Saudite te klubi Ohod.
Ai ka drejtuar edhe Egnatian, Prishtinën, Feronikelin, Shkupin, Trepçën ’89 dhe Flamurtarin.
Me katër prej pesë klubeve sa i udhëhoqi në Kosovë, ka fituar pesë tituj të kampionit. Pa trofe mbeti te Gjilani. Me 89-shin dhe Prishtinën e fitoi edhe Superkupën, ndërsa me Feronikelin e Drenasit tre trofetë.
Katër skuadrat kampione i ka udhëhequr edhe në garat evropiane. Rrugëtimin më të gjatë e ka me Dritën e Gjilanit, të cilën e udhëhoqi deri në plejof të fazës nokaut të Ligës së Konferencës. Në garën e tretë të UEFA-s për nga niveli, Drita është ende në garë.
Me fitoren e arritur të martën 2:1 ndaj ekipit të Maltës, Florianas, Drita kaloi në raundin e tretë kualifikues të Ligës së Konferencës. Por fitoren e arriti vetëm pas vazhdimeve.
Drita ishte pa fitore në ndeshje përgatitore, e po ashtu në ndeshjet evropiane, pa llogaritur këtë të fundit pas vazhdimeve.
