Deputeti i Aleancës, Burim Ramadani ka kritikuar Qeverinë e Kosovës për blerjen e produkteve nga Serbia, duke e cilësuar si “hipokrizi të pushtetit të Vetëvendosjes”.
Në ditën e 21-të të bllokadës së re, Ramadani ka thënë se pas heqjes së tarifës 100 për qind ndaj produkteve serbe nuk është vendosur ndonjë program për mbështetjen e prodhimit vendor.
Ai ka pretenduar se, përveç qytetarëve, edhe institucionet e Kosovës vazhdojnë të blejnë mallra nga Serbia.
Si shembull, Ramadani ka përmendur një kontratë të Ministrisë së Shëndetësisë për furnizim me barin “Tramadol 50 mg/2 ml injeksion”, me emrin tregtar “Trodon”, prodhues “Hemofarm AD” nga Vërshaci i Serbisë.
Sipas të dhënave të publikuara nga ai, blerës në këtë kontratë ishte Ministria e Shëndetësisë, ndërsa furnizues “Exclusive Corporation SH.P.K.” nga Gjilani. Kontrata, sipas Ramadanit, mban datën 12 qershor 2024.
Ramadani ka theksuar se kontrata është lidhur nëntë muaj pas sulmit të armatosur në Banjskë.
“Po të funksiononte sot Kuvendi, do të ballafaqonim fort këtë hipokrizi të pushtetit të Vetëvendosjes, që blen barna në Serbi edhe pas sulmit paramilitar terrorist të Serbisë në Banjskë”, ka deklaruar Ramadani.
Ai ka shtuar se mungesa e funksionalizimit të Kuvendit ka pamundësuar, sipas tij, ballafaqimin institucional për këto çështje./teve1.info/
