Dy mesfushorët, Arbnor Ramadani dhe Kushtrim Shabani, janë nderuar nga skuadra e Llapit me rastin e arritjes jubilare, 200 paraqitjeve zyrtare në të gjitha garat me fanellën e klubit nga Podujeva.
Ramadani, i cili bartë numrin 10, në 200 paraqitje për Llapin, ka shënuar 22 gola dhe ka bërë 29 asistime kure Shabani ka kontribuuar me 15 gola e 10 asistime derisa bartë fanellën me numrin 7.
Këto paraqitje jubilare, të dy mesfushorët i arritën në ndeshjen kundër Dukagjinit, të cilën Llapi e humbi 1:0 në shtëpi në kuadër të xhiros së 15-t të Superligës së Kosovës në futboll.
“Këto shifra flasin vetë për ndikimin e tyre në ekip, por mbi të gjitha edhe për karakterin, përkushtimin dhe vazhdimësinë që i kanë dhënë klubit ndër vite. KF Llapi i uron suksese të mëtejshme të dy lojtarëve tanë, me besimin se momentet e mira dhe sukseset e reja do të vazhdojnë së bashku”, ka shkruar Llapi në njoftimin e postuar në Facebook.
Aktualisht, Llapi zë vendin e gjashtë në tabelë me 20 pikë të tubuara, gjashtë më pak se Ballkani, Prishtina e Dukagjini, skuadra që ndajnë tri pozitat e para.
