Kryetari i Komunës së Prishtinës, Përparim Rama ka njoftuar se të gjithë qytetarët se nga sot mund të blejnë biletat e autobusit të “Trafikut Urban”, përmes sms-ve.
Rama ka bërë të ditur se pas digjitalizimit, konduktorët nuk do të mbesin pa punë, por do të sistemohen në ndërmarrje.
Ai, ka thënë se qytetarët mund të blejnë biletën një drejtimshe dhe biletën ditore në linjat 1, 3, 3B, 3C, 4 dhe 7C. Po ashtu biletën vajtje – ardhje për aeroport, duke dërguar SMS përmes operatorëve IPKO dhe Vala.
Rama, përmes rrjetit social Facebook, ka treguar se si duhet bërë pagesa e biletës me SMS .
“1. Për biletën për Linjat 1, 3, 3B, 3C, 4 dhe 7C, dërgoni SMS në numrin 55990 me tekstin: (Emri i linjës).
- Për biletën ditore, dërgoni SMS në numrin 55991 me tekstin: Ditore.
- Për biletën për Linjën 1A, dërgoni SMS në numrin 55992 me tekstin: Linja 1A
Pasi të dërgoni sms-ët ju do të pranoni konfirmimin përmes mesazhit”, ka shkruar ai.
Rama, gjithashtu ka bërë apel te qytetarët që ta ruajnë mesazhin konfirmues për ta paraqitur tek konduktori.
