Kryetari i Komunës së Prishtinës, Përparim Rama ka thënë se të enjten me shumicë votash të këshilltarëve komunalë është votuar Rregullorja për Menaxhimin e Parkingjeve Publike.
Rama ka thënë se ne rregulloren e votuar është eliminuar pagesa për banorët rezident në adresën e tyre, shkruan teve1.info
Po ashtu, gjatë seancës u votua propozimi që të ulet çmimi i pagesës për parking për automjetin e dytë, e sipas tij, edhe kjo mjaft pozitive për banorët.
“Është bërë zgjatja e orarit të punës së Prishtina Parking deri në orën 23:00 me qëllim që të sigurojë se në zonat rezidenciale hapësirat shfrytëzohen nga banorët rezident. Kësaj i është bashkangjitur edhe kufizimi i parkimit të vizitorëve në hapësirat rezidenciale me qëllim që prioritet të jetë banori i rrugës përkatëse.
Një punë e përbashkët nga të gjithë pjesmarrësit, grupi punues, Prishtina Parking dhe kontributi përmes propozimeve/amandamentimeve nga anëtarët e Kuvendit Komunal, tashmë ka sjellë një rregullore që siguron funksionalitet dhe rregull në lagje dhe në parkingjet e Prishtinës”, ka thënë Rama./teve1.info
