Kryetari i Prishtinës, Përparim Rama, ka thënë se e kupton frustrimin e qytetarëve të cilët edhe kanë paralajmëruar protestë të dielën për të kundërshtuar mbylljen e rrugës “Xhorxh Bush”.
Por, ai ka thënë se problemet nuk evitohen duke lejuar që makinat të hyjnë në qendër të qytetit.
Rama në një konferencë për media, ku ka prezantuar projektin për sheshin “Xhorxh Bush”, ka thënë se duhet të krijohen transporte dhe rrugë alternative.
“Problemi i trafikut ka qenë vite më parë. Nuk evitohet problemi duke lënë me ardh makina në qendër, problemi evitohet duke kriju transporte alternative dhe unaza e jashtme dhe e brendshme me parkingje nëntokësore për me limitu qasjen e trafikun brenda”, ka thënë Rama, përcjell teve1.info
Rama ka thënë se sheshi i ri do të ketë ndërlidhje me disa pjesë të qytetit. Ai ka thënë se do të jenë tri platforma në qendër të sheshit të ri, teksa ka prezantuar planin nëpërmjet fotografive.
Ai ka përsëritur se sheshi do të zgjatet deri kur të ndërtohet Xhamia e Madhe te Posta e më pas edhe deri te Rrethi i flamurit
Rama është shprehur i vendosur për ta bërë “transformimin e kryeqytetit” dhe sipas tij kjo do të bëhet brenda 8 viteve.
