Kryetari i Prishtinës, Përparim Rama, në emër të kryeqytetit ka thënë se janë të gatshëm t’i dalin në ndihmë qytetarëve të Pejës, pas vërshimeve si pasojë e reshjeve të shiut.
Rama, tha se ndihma nuk do të mungojë në këto vërshime, në mënyrë që situata të kalojë pa pasoja.
I pari i Prishtinës ka shprehur ngushëllime për familjen Ademaj, ku si pasojë e reshjeve të shiut kanë humbur jetën nëna me fëmijën e saj 5-vjeçar.
“Jemi të gatshëm që me gjithë kapacitetet tona si Kryeqytet të dalim në ndihmë qytetarëve të Pejës. Ndihma jonë nuk do të mungojë që këto vërshime të kalojnë me sa më pak pasoja. Shprehim ngushëllimet më të sinqerta për familjen Ademaj, të cilët humbën tragjikisht dy anëtarë të çmueshëm të tyre”, ka shkruar Rama në Facebook.
Si pasojë e reshjeve të mëdha të shiut në Komunën e Pejës, Policia e Kosovës ka konfirmuar se një grua dhe fëmija i saj kanë humbur jetën, derisa edhe dy persona të tjerë si pasojë e lëndime trupore janë të shtrirë në Spitalin e Pejës./teve1.info/
