Kryetari i Prishtinës, Përparim Rama sot është takuar me aktivistë nga shoqëria civile për të biseduar për çështjen e trajtimit të qenve.
Ai tha se “synimi ynë është të hartojmë rregullore të reja për trajtimin e qenve me pronar dhe pa pronar dhe të përgatisim kontratën për adoptim të qenve”.
“Vendosëm të bashkohemi në një grup punues, që përfshin përfaqësues nga komuna, aktivistë dhe anëtarë të shoqërisë civile. Synimi ynë është të hartojmë rregullore të reja për trajtimin e qenve me pronar dhe pa pronar dhe të përgatisim kontratën për adoptim të qenve.
Biseda jonë ishte konstruktive dhe zgjati më shumë se një orë. Me këtë rast, dëshmova se çështja e qenve endacakë po trajtohet seriozisht dhe se të gjitha shqetësimet, kërkesat dhe ankesat e palëve do të marrin vëmendjen e duhur nga komuna. Ekipi ynë është i vendosur të nisë menjëherë punën për hartimin e rregullores dhe vazhdojnë veprimet e shumta për gjetjen e zgjidhjes së përshtatshme. Bashkohuni me ne në këtë rrugëtim për të siguruar trajtimin e qenve në mënyrë të duhur!”, ka shkruar ai.
