Kryetari i Prishtinës, Perparim Rama ka njoftuar se të hënën ka pritur në takim përfaqësuesit e Sindikatës së Punëtorëve të kompanisë “Pastrimi”.
Rama i ka falënderuar sindikalistët dhe punëtorët për siç ka thënë qëndrimin e tyre të përgjegjshëm dhe ka premtuar që askush nuk do të mbetet pa punë për shkak të ‘dështimeve menaxheriale’.
Ai ka shtuar se janë të vendosur të veprojnë me integritet dhe vendosmëri për të mbrojtur interesin publik dhe dinjitetin e punëtorëve.
“Nuk do të lejojmë që keqmenaxhimi të rrezikojë shëndetin publik dhe pagat e punëtorëve të ndërrmarjes “Pastrimi”. Sot prita në takim përfaqësuesit e Sindikatës së Punëtorëve të kompanisë “Pastrimi”. I falënderoj sindikalistët dhe të gjithë punëtorët për qëndrimin e tyre të përgjegjshëm dhe për bashkëpunimin e tyre të sinqertë në këto momente të kritike për ta dhe qytetarët. Ne jemi në anën tuaj. Të drejtat tuaja nuk janë të negociueshme, dhe askush nuk do të mbetet pa punë për shkak të dështimeve menaxheriale. Jemi të vendosur të veprojmë me integritet dhe vendosmëri për të mbrojtur interesin publik dhe dinjitetin e punëtorëve”, ka shkruar Rama në Facebook.
Ndryshe, punëtorët e “Pastrimit” kanë protestuar të hënën para Komunës së Prishtinës.
