Kryeministri i Shqipërisë, Edi Rama ka thënë se Shqipëria është më afër se kurrë realizimit të ëndrrës historike për anëtarësimin në Bashkimin Evropian, por paralajmëroi se vitet e ardhshme do të jenë vendimtare dhe më të vështirat.
Ai kështu është shprehur në Asamblenë e Partisë Socialiste në Elbasan, ku u ndal kryesisht në procesin e integrimit evropian dhe mbi rolin e PS-së për të ruajtur ritmin e reformave.
“Shqipëria është më afër se kurrë integrimit në BE, por ky proces kërkon përpjekje të mëdha, ndërsa Partia Socialiste duhet të ruajë ritmin, motivimin dhe të përballet me sfidat pa u lëkundur.Nuk kemi qenë kurrë kaq afër realizimit të një ëndrre historike. Hapat e fundit që kemi përpara janë edhe më të vështirat, sepse është faza kur duhet të përputhim të gjithë organizimin tonë shtetëror me atë të BE-së, jo vetëm në aspektin e ligjeve, por edhe të standardeve,” u shpreh Rama.
Gjatë fjalës së tij, ai kërkoi më shumë vetëdije dhe përgjegjësi nga qytetarët dhe strukturat politike, duke theksuar se Partia Socialiste duhet të vijojë përpara pa humbur motivimin, pavarësisht kundërshtarëve politikë dhe presionit mediatik.
“PS-ja dhe familja jonë politike duhet të përballet pa e humbur kthjelltësinë dhe pa humbur për asnjë moment motivimin për të shkuar çdo ditë e më shpejt përpara, pavarësisht forcave dhe faktorëve që janë tërësisht kundër nesh,” tha ai.
Rama akuzoi kundërshtarët politikë dhe rrjetet sociale për shpërndarje të lajmeve të rreme dhe deformim të realitetit publik.
“Ka forca e faktorë politikë, mediatikë dhe socialë që prodhojnë e shpërndajnë në mënyrë marramendëse gënjeshtra, gjysmë të vërteta dhe akuza. Lajme të cilat edhe kur nuk janë të pavërteta vendosen në një proporcion të zhdrejtë me realitetin,” u shpreh Rama./rtsh.al/
