Kryeministri i Shqipërisë, Edi Rama, ka bërë të ditur se të mërkurën (11 qershor) Shqipëria ka marrë dritën jeshile për hapjen e negociatave për Grupkapitullin 4 – “Agjenda e Gjelbër dhe Ndërlidhja e Qëndrueshme”.
Nëpërmjet një postimi në Facebook, Rama ka theksuar se ky është një tjetër hap i rëndësishëm drejt anëtarësimit të Shqipërisë në Bashkimin Evropian.
“Ky vendim i vendeve anëtare të BE konfirmon përgatitjen tonë dhe progresin konkret në rrugën drejt familjes europiane. Kapitujt përfshijnë: Politikat e transportit (Kapitulli 14), Energjia (Kapitulli 15), Rrjetet trans-europiane (Kapitulli 21), Mjedisi dhe klima (Kapitulli 27)”, ka shkruar ai në Facebook.
Shqipëria hapi kapitullin e parë të negociatave për anëtarësim në Bashkimin Evropian në tetor të vitit 2024. Asaj i duhet të hapë dhe të mbyllë gjithsej 33 kapituj për t’u anëtarësuar në BE.
