Kryetari i Prishtinës Përparim Rama ka paralajmëruar se sonte do të fillojë largimi mbeturinave në kryeqytet, pasi ndërmarrja Pastrimi ka ndërprerë shërbimin për largimin e tyre për shkak të mos pagesës së borxheve.
Në një deklaratë për media, Rama i ka quajtur të pavërteta pohimet se komuna i ka bërë mbi dy milionë euro borxh kompanisë “Pastrimi”.
“Sonte, Kryeqyteti do të fillojë largimin e mbeturinave. Komuna e Prishtinës po përballet me një sabotim të hapur nga ndërmarrja Pastrimi, një kompani publike që, nën drejtimin aktual, është shndërruar në simbol të keqmenaxhimit dhe mungesës së përgjegjësisë. Deklaratat e menaxhmentit të ndërmarrjes Pastrimi, se Komuna e Prishtinës i ka borxh 2.7 milionë euro, janë të pavërteta. Komuna e Prishtinës ka zero borxh ndaj ndërmarrjes Pastrimi, ka thënë ai.
Ai ka theksuar se ndërmarrja “Pastrimi” ka përfituar 11.5 milionë euro të hyra direkte nga Komuna e Prishtinës, në bazë të detyrimeve kontraktuale, 1.4 milion euro për blerjen e kamionëve të rinj të pastrimit, 3 mijë e 800 kontejnerë të rinj, të financuar nga Komuna, 400 mijë euro në formë subvencionesh shtesë.
“Megjithatë, përkundër kësaj përkrahjeje të jashtëzakonshme, menaxhmenti i “Pastrimit” ka keqpërdorur paranë publike për rritje të pagave për kryeshefin dhe menaxhmentin, punësime të panevojshme dhe të motivuara politikisht, në kundërshtim me nevojat reale të kompanisë”, ka shtuar Rama.
Sipas tij, Komuna e Prishtinës në dhjetor 2024 dhe shkurt 2025 ka ftuar zyrtarisht ndërmarrjen “Pastrimi” për të nënshkruar kontratën e shërbimeve, por kjo është refuzuar nga menaxhmenti i saj.
Ndërkohë, sot kompania ka lajmëruar se ka ndërprerë shërbimet e grumbullimit të mbeturinave në të gjithë Prishtinën.
Ndryshe, Rama javën e kaluar kishte thirrur seancë të jashtëzakonshme për datën 13 maj 2025, me qëllim të subvencionimit të pagave të punëtorëve të Pastrimit në vlerë 300 mijë euro, por seanca nuk u mbajt për shkak të mospjesëmarrjes së opozitës.
