Kryetari i Prishtinës, Perparim Rama ka reaguar pas ndërprerjes për herë të tretë të punimeve në sheshin “Xhorxh Bush” në Prishtinë.
Rama nëpërmjet një video në Facebook ka thënë se punimet janë ndalur për shkak se sipas Inspektoratit të Trashëgimisë Kulturore gjysma e rrugës është trashëgimi kulturore, ndërsa gjysma tjetër jo.
Ai ka shtuar se ndalimi i punimeve po bëhet për arsye puro politike sepse sipas tij nuk kanë asnjë bazë ligjore dhe nuk kanë asnjë dokument ligjor për ta ndërprerë këtë punë.
Kryetari i Prishtinës ka paralajmëruar se punimet do të vazhdojnë dhe se do të dërgojnë kallëzime penale për të gjithë ata që siç ka thënë ai ’e pengojnë zhvillimin e kryeqytetit’.
“Me presion nga ministri i Punëve të Brendshme, me presion nga ministri i Kulturës i detyrojnë dhe i shfrytëzojnë këtu Policinë që të na i ndërprejnë punimet. Punime të cilat thonë që gjysma e rrugës qenka e mbrojtur, ndërsa gjysma tjetër e rrugës nuk qenka e mbrojtur edhe ne mundemi tash me vazhdu vetëm në këtë anë. Pra, kjo qeveri në ikje i shfrytëzon të gjitha instancat në mënyrë joligjore sepse nuk kanë asnjë bazë ligjore, nuk kanë asnjë dokument ligjor për ta ndërprerë këtë punë dhe ja që e ndërpresin dhe nuk iu intereson që humbin kohë për qytetarët. Pra, për aspekte puro politike na e pengojnë zbatimin e punimeve këtu në sheshin Xhorxh Bush. Ne do të vazhdojmë me punë dhe natyrisht që do të dërgojmë edhe kallëzime penale për të gjithë ata që na e pengojnë zhvillimin e kryeqytetit”, ka thënë Rama.
Ndryshe, Komuna e Prishtinës të hënën ka rinisur punimet në këtë shesh pas ndërprerjes dy herë nga Inspektorati i Trashëgimisë Kulturore.
Në nisjen e këtyre punimeve prezent ishte edhe vetë kryetari i Prishtinës, Përparim Rama, e po ashtu edhe zyrtarë të Policisë së Kosovës./teve1.info/
Ndërpriten sërish punimet në një pjesë të sheshit “Xhorxh Bush”
