Kryetari i Komunës së Prishtinës, Përparim Rama, ka reaguar pas zhvillimeve të fundit lidhur me kallëzimin penal të dorëzuar në Prokurorinë Speciale, pas publikimit të materialeve që përmbajnë pretendime ndaj shefit të Kabinetit të tij, Florent Maliqi, duke theksuar gatishmërinë për bashkëpunim me organet e drejtësisë.
Përmes një postimi në rrjetet sociale, Rama tha se është pozitiv fakti që çështja po i drejtohet Prokurorisë, ndërsa shtoi se institucionet duhet t’u përgjigjen thirrjeve të drejtësisë. Ai theksoi se dyert e Kryeqytetit kanë qenë gjithmonë të hapura për organet kompetente dhe garantoi transparencë të plotë në trajtimin e çdo kërkese.
Në të njëjtën linjë, përmes rrjetit social, Facebook, reagoi edhe Kryeqyteti i Prishtinës, duke deklaruar se pret trajtimin e rastit nga Prokuroria lidhur me materialet e publikuara që përmbajnë pretendime ndaj Shefit të Kabinetit të Ramës, Florent Maliqi. Sipas reagimit, institucionet komunale do të ofrojnë bashkëpunim të plotë dhe do të ndërmarrin veprime ligjore ndaj kujtdo që rezulton se ka shkelur ligjin.
Këto reagime vijnë pasi Grupi i Asamblistëve të Lëvizjes Vetëvendosje në Prishtinë ka dorëzuar kallëzim penal ndaj kryetarit Rama dhe zyrtarëve të kabinetit të tij, duke kërkuar hetime për pretendimet e paraqitura nga sinjalizuesi mbi legalizime të jashtëligjshme të objekteve.
Në një konferencë për media, këshilltarja komunale e LVV-së Berita Abazi bëri të ditur se kallëzimi bazohet në një e-mail të dërguar nga një sinjalizues anonim, i cili, sipas saj, përmban komunikime që lidhen me legalizime të dyshimta, kompani ndërtimi dhe shuma të mëdha parash.
