Kryeministri i Shqipërisë, Edi Rama ka prezantuar projektbuxhetin e vitit 2026, duke njoftuar një paketë të gjerë rritje pagash, duke ofruar mbështetje më të madhe për shërbimet bazë të administratës publike.
Rama bëri të ditur se përfitues do të jenë punonjës të kategorive si sanitare, shoferë, teknikë, aktivistë, magazinierë, protokollistë dhe punonjës të tjerë të shërbimeve, specialistë të administratës publike, sektori i shëndetësisë dhe ai i arsimit.
“10 mijë e 600 punonjës shërbimi, sanitare, shoferë, teknikë, aktivistë, magazinierë, protokollistë, do përfitojnë nga rritja e pagës minimale me 10 mijë lekë të reja në muaj. Specialistë të administratës publike 5 mijë lekë të reja në muaj. Mësuesit do përfitojnë 3 mijë lekë të reja në muaj.”
“Në Shëndetësi përveç indeksimit vjetor do fillojë për herë të parë llogaritja e vjetërsisë në punë që paga e mjekut të përgjithshëm do shkojë nga 131 mijë e 700 lekë në 143 mijë e 500 lekë. Paga e infermiereve nga 87 mijë lekë do shkojë në 92 mijë e 500 lekë”, theksoi Rama, citon RTSH.
Kryeministri Rama njoftoi poashtu rritja e pagave prek të gjitha nivelet e Policisë së Shtetit.
Ai theksoi se paketa e rritjes së pagave për administratën publike dhe strukturat e tjera shtetërore do t’i kushtoj buxhetit shqiptar për vitin 2026 një kosto totale prej 100 milionë eurosh.
