Kryetari i Prishtinës, Përparim Rama, ka premtuar investime në infrastrukturën sportive për Lojërat Mesdhetare “Prishtina 2030”.
Ai tha se vizioni i Kosovës për Lojërat Mesdhetare përputhet me fokusin e Komitetit Ndërkombëtar për efiçencën dhe qëndrueshmërinë e burimeve.
“Do ta ndërtojmë stadiumin olimpik të premtuar, me gjithë qendrën sportive, me qëllimin që të krijojmë një trashëgimi të qëndrueshme infrastrukturore, që do ta gëzojmë edhe përtej vetë ngjarjes, në shërbim të fuqizimit të mëtejmë të atletëve tanë, që të na shkëlqejnë kudo nëpër arenat sportive ndërkombëtare”, ka shkruar Rama.
Rama, tutje thotë se do ta optimizojmë infrastrukturën ekzistuese dhe në mënyrë strategjike do të shtojnë objekte të reja.
“Vizioni ynë në Kosovë për Prishtina 2030 përputhet me fokusin e Komitetit Ndërkombëtar të Lojërave Mesdhetare për efiçencën dhe qëndrueshmërinë e burimeve. Ne do ta optimizojmë infrastrukturën ekzistuese dhe në mënyrë strategjike do të shtojmë objekte të reja. Po, do të ndërtojmë ambiente të reja sportive, sepse angazhimi ynë shtrihet edhe përtej këtyre Lojërave”, ka shkruar në Facebook./teve1.info/
