Kryeministri i Shqipërisë, Edi Rama u takua këtë të mërkurë, më 22 prill, me homologun e tij grek, Kyriakos Mitsotakis, gjatë një vizite pune në Athinë.
Në fokus të takimit, bëri të ditur Rama, ishte pikërisht forcimi i marrëdhënieve dypalëshe dhe marrëveshja për një partneritet të ri strategjik mes Shqipërisë dhe Greqisë.
Kryeministri Rama thekson gjithashtu se të dyja palët po punojnë për të kapërcyer të gjitha çështjet e mbartura mes dy vendeve, dhe për t’i ngritur marrëdhëniet shqiptaro-greke në një nivel të ri.
“Me kryeministrin e Greqisë, Kyriakos Mitsotakis, na lidh një miqësi e posaçme e farkëtuar në rrugën e përbashkët të ambicies për të modernizuar vendet tona dhe për t’i ngritur marrëdhëniet shqiptaro-greke në një nivel të ri. Përgjatë kësaj rruge jo vetëm momentet më të mira, po edhe ato më të vështirat janë karakterizuar gjithnjë nga komunikimi plot respekt e pa dorashka, ndërkohë që po punojmë për kapërcimin përfundimtar të të gjitha çështjeve të mbartura mes dy shteteve, për të dalë nga ky vit me një marrëveshje të re partneriteti strategjik”, shkruan Rama.
Vizita e Ramës në Athinë vjen në kuadër të Forumit Ekonomik të Delfit, ku pritet të zhvillohen takime të tjera me përfaqësues të lartë të politikës dhe ekonomisë./rtsh.al/
