Kryetari i Prishtinës, Përparim Rama, ka konfirmuar se Komuna e Prishtinës ka realizuar pagesën ndaj Trafikut Urban, duke zgjidhur situatën e ndërprerjes së transportit publik në kryeqytet. Ai njoftoi se shërbimi i autobusëve do të rikthehet të mërkurën.
“Sot, sapo u alokuan mjetet nga Ministria, ne si komunë menjëherë realizuam pagesën ndaj Trafikut Urban. Nga nesër rikthehet shërbimi për qytetarët, të cilëve u kërkojmë ndjesë për shqetësimet dhe i falënderojmë për mirëkuptimin”, ka deklaruar Rama.
Kryetari u shprehu mirënjohje edhe punëtorëve të Trafikut Urban për angazhimin e tyre të përditshëm.
“Punëtorëve të Trafikut Urban u shprehim mirënjohje të veçantë për korrektësinë dhe për punën e palodhshme që e bëjnë çdo ditë për kryeqytetin tonë. Ju uroj punë të mbarë dhe shëndet!”, ka shtuar ai.
Me realizimin e pagesës, pritet stabilizimi i plotë i shërbimit të transportit publik në Prishtinë.
