Kryetari i Prishtinës, Përparim Rama, ka reaguar lidhur me mos-përfshirjen e buxhetit të kryeqytetit në Projektligjin për Buxhetin e Kosovës, duke e konsideruar këtë një shkelje të rendit kushtetues dhe jo një gabim administrativ.
Sipas Ramës, përjashtimi i buxhetit është bërë pa asnjë bazë ligjore.
Ai tha se më 6 shkurt 2026, Kuvendi i Kryeqytetit kishte miratuar buxhetin e komunës për vitin 2026 dhe e kishte dërguar brenda afateve te Ministria e Administrimit Publik Lokal dhe Ministria e Financave, por ai nuk është përfshirë në projektligjin për ndarjet buxhetore të Republikës së Kosovës.
Ai shtoi se ka kërkuar reagim nga Ministria e Financave dhe paralajmëroi se nëse Ligji miratohet pa përfshirë buxhetin e Prishtinës, do të dërgohet në Gjykatën Kushtetuese për shqyrtim.
“Ju kemi drejtuar edhe Ministrisë së Financave me kërkesë të qartë që të korigjojë menjëherë këtë shkelje dhe të jap përgjigje brenda afatit ligjor. Nëse Ligji miratohet duke injoru buxhetin e Kryqytetit atëherë ky ligj do të dërgohet në Gjykatën Kushtetutese”, tha Rama.
