Kryeministri i Shqipërisë, Edi Rama ka reaguar pas zhvillimeve të sotme në veri të vendit.
Ai ka thënë se lëndimi i ushtarëve të KFOR-it ngarkon me përgjegjësi dhunuesit por edhe lëndon Kosovën në sytë e aleatëve.
“Lëndimi i ushtarëve të KFOR-it ngarkon me përgjegjësi të drejtëpërdrejtë dhunuesit e tyre të verbër dhe fatkeqësisht lëndon Kosovën në sytë e aleatëve e miqve të saj të pazëvendësueshëm! Sa më shumë zgjatet ky konflikt i rrezikshëm dhe i panevojshëm, aq më shumë lëndohet Kosova!”, ka shkruar Rama.
Rama ka shkruar se nga “udhëkryqi” dilet vetëm me dialog e aleatë të fuqishëm.
“Nga ky udhëkryq ku konflikti kthehet e rikthehet çdo vit si produkt i të shkuarës, me Serbinë që ekspozon trupat në kufirin ku fuqia e saj është e barabartë me zero dhe Kosovën që ekspozon ngurrimin e saj për të finalizuar dialogun, dilet vetëm me dialog e me aleatë të fuqishëm!”, ka shkruar kryeministri shqiptar.
„Thirrja ime për t’i dëgjuar me vëmendje ata aleatë e për të mos u futur më thellë në shtegun jo vetëm të rrezikshëm, po edhe të kotë ku Kosova po lëndohet ndërkombëtarisht bashkë me ushtarët e KFOR-it që po lëndohen fizikisht, s’është thirrje ndërkombëtare po nevojë kombëtare!”, ka shkruar lideri i ekzekutivit shqiptar në Twitter.