Kryetari i Komunës së Prishtinës, Përparim Rama, ka reaguar lidhur me dhënien e shtetësisë së Republikës së Kosovës, Boiken Abazit.
Rama, në reagimin e tij përmes rrjetit social “Facebook”, ka thënë se ai që kundërshtoi shtetësinë e Kosovës dhe sulmoi institucionet e Kosovës, tani bëhet qytetar i Kosovës.
“Ironikisht,ky që kundërshtoi shtetësinë e Kosovës, i sulmoj institucionet e Kosovës, rrezikoi jetën e zyrtarëve të Republikës së Kosovës dhe të cilit iu ndalua
hyrja në territorin e Kosovës sepse përbënte rrezik kombëtar, tani bëhet qytetar i Kosovës!”, shkruan Rama.
Tutje, në shkrimin e tij, Rama tha se Abazi është dëbuar nga Kosova në vitin 2016, sepse përbënte rrezik për “sigurinë kombëtare”.
“Boiken Abazi, i dëbuar nga Republika e Kosovës në vitin 2016 sepse përbënte rrezik për “sigurinë kombëtare”, i evidentuar nga organet e Kosovës për “sulm ndaj personit zyrtar”, “prishje të rendit publik” dhe “asgjësim apo dëmtim të pasurisë”, qenka pajisur me shtetësi të Kosovës”, tha Rama.
Më tej, Rama, në reagimin e tij, shtroi pyetje duke thënë se “Ligjërisht, si e pajis një deputete dikë me shtetësi? dhe
“Moralisht, pse duhet ta marrë shtetësinë e një shteti dikush që ka rrezikuar sigurinë e atij shteti?”.
