Kryetari i Prishtinës, Përparim Rama, ka shprehur ngushëllime për vdekjen e ish-kryeparlamentarit Nexhat Daci, duke vlerësuar kontributin e tij në ndërtimin dhe konsolidimin e institucioneve të Kosovës.
Ai ka theksuar se kontributi dhe trashëgimia e Dacit do të mbeten pjesë e kujtesës institucionale të vendit.
“Me pikëllim morëm lajmin për ndarjen nga jeta të ish-Kryetarit të Kuvendit të Kosovës, akademikut dhe profesorit Nexhat Daci. Gjatë veprimtarisë së tij publike dhe akademike, ai dha kontribut të rëndësishëm në ndërtimin dhe konsolidimin e institucioneve të Kosovës, duke lënë gjurmë të dallueshme në jetën politike dhe shoqërore të vendit. Në emër të Kryeqytetit, shpreh ngushëllimet më të sinqerta për familjen, miqtë dhe bashkëpunëtorët e tij. Kontributi dhe trashëgimia e tij do të mbeten pjesë e kujtesës sonë institucionale”, ka shkruar Rama në Facebook.
