Kryetari i Prishtinës, Përparim Rama, u ka kërkuar falje qytetarëve për papastërtinë e rrugëve të kryeqytetit, si pasojë e grevës së punëtorëve të kompanisë “Pastrimi”, raporton teve1.info
Përmes një statusi në Facebook, Rama ka thënë se rrugët janë të mbushura me mbeturina derisa ka shtuar se një gjë e tillë është e papranueshme.
I pari i kryeqytetit ka shkruar se është angazhuar për të gjetur një zgjidhje me punëtorët e “Pastrimit” dhe për këtë po punon.
“Të nderuar banorë të qytetit,
Me shqetësim të madh po e adresoj grevën e fundit të punëtorëve të Ndërmarrjes “Pastrimi”.
Ne e kuptojmë zhgënjimin e punëtorëve dhe njohim të drejtën e tyre për të protestuar, por vendimi i tyre për të ndërprerë punën ka pasur një ndikim të rëndë në pastërtinë e qytetit tonë.
Rrugët janë të mbushura me mbeturina dhe kjo situatë është e papranueshme.
Ne kemi qenë aktivisht të angazhuar me Ndërmarrjen për të gjetur një zgjidhje për këtë çështje dhe jemi të përkushtuar për të arritur një marrëveshje të drejtë nga e cila do të përfitojnë edhe punëtorët dhe kryeqyteti.
Ndërkohë, ne jemi duke vendosur të gjitha burimet në dispozicion për të menaxhuar situatën dhe për të pastruar sa më shpejt mbeturinat.
Kërkojmë ndjesë për shqetësimin e shkaktuar dhe ju sigurojmë se po punojmë me përkushtim të plotë për të zgjidhur sa më shpejtë situatën”, ka shkruar Rama.
