Kryetari i Komunës së Prishtinës, Përparim Rama, ka reaguar ndaj kërkesës së Prokurorisë për dënime maksimale ndaj ish-krerëve të Ushtrisë Çlirimtare të Kosovës, duke e cilësuar atë si një akt të turpshëm të shtrembërimit të së vërtetës dhe një sulm politik ndaj luftës çlirimtare.
Rama ka thënë se kërkimi i dënimeve deri në 45 vjet burg për udhëheqësit e UÇK-së përbën kriminalizim të rezistencës ndaj okupimit dhe, sipas tij, legjitimon krimet e agresorit.
“Kërkesa e Prokurorisë për dënime maksimale ndaj ish-krerëve të Ushtrisë Çlirimtare të Kosovës është një akt i turpshëm i shtrembërimi të së vërtetës dhe një sulm politik ndaj luftës çlirimtare. Të kërkosh dënime prej 45 vjetësh për krerët e UÇK-së, do të thotë të kriminalizosh rezistencën ndaj okupimit dhe të legjitimosh, krimet e agresorit. Ky proces nuk synon të zbardhë përgjegjësi individuale, por të godasë vetë aktin e çlirimit dhe ta paraqesë luftën për liri si vepër penale”, ka shkruar Rama në një postim në Facebook.
Ai ka shtuar se, sipas tij, në këtë proces nuk po gjykohen individë, por po sulmohet një komb i tërë, duke tentuar të përmbyset historia dhe të zhvendoset faji nga agresori te viktima.
“Këtu nuk po gjykohen individë, por po sulmohet një komb. Po tentohet të përmbyset historia duke e zhvendosur fajin nga agresori te viktima, nga shteti që kreu krime te ata që u ngritën kundër tyre. Kjo është padrejtësi e institucionalizuar dhe revizionizëm politik! Një drejtësi që barazon pushtuesin me të pushtuarin nuk është drejtësi. Është një farsë që rrezikon të shndërrohet në njollë të përhershme mbi kujtesën historike dhe mbi vetë nocionin e drejtësisë ndërkombëtare”, ka përfunduar Rama.
Ndryshe, kryeprorkurorja e Zyrës së Prokurorit të Specializuar, Kimberly West, të hënën, ka kërkuar nga 45 vjet dënim për katër të akuzuarit e rastit më të madh të Dhomave të Specializuara. West i kërkoi Speciales po ashtu që ta marrë parasysh peshën e veprimeve të secilit të akuzuar.
