Hakmarrje politike dhe shkelje flagrante të të drejtave të qytetarëve për shërbime dhe mirëqenie e ka quajtur kryetari i Prishtinës, Përparim Rama bllokimin e buxhetit të kryeqytetit.
Sipas Ramës kjo nuk është më një vonesë procedurale, por një bllokadë e qëllimshme që po dëmton drejtpërdrejt jetën e përditshme të qytetarëve.
“Prej më shumë se gjysmë viti, Prishtina është pa buxhet. Çerdhet dhe kopshtet nuk kanë më fonde për të siguruar ushqim për fëmijët. Programet sociale janë bllokuar. Familjet në nevojë, personat me aftësi të kufizuara, të moshuarit, artistët dhe sportistët kanë mbetur pa asnjë mbështetje institucionale. Rreziku është alarmant dhe prek të gjitha shërbimet jetike në Kryeqytet: qendrat e kujdesit shëndetësor dhe transporti publik rrezikojnë shërbimin dhe arsimi parashkollor është në vështërsi. Të gjitha shërbimet jetike janë prekur nga bllokada e qeverisë”, ka shkruar ai në Facebook.
Më tej ai ka bërë të ditur se përtej buxhetit qendror, janë bllokuar edhe të hyrat vetanake të Komunës së Prishtinës ‘të mbledhura nga vetë kontributi i qytetarëve’.
“Kryeqytetit i bllokohet buxheti i nevojshëm për të paguar faturat e saj elementare. Një ndalese e jashtëligjshme e motivuar politikisht, që qëllimshëm po paralizon funksionimin institucional. Ky është një akt i paprecedent dhe i papranueshëm që i shndërron qytetarët në pengje të një kalkulimi politik.Një bllokadë e tillë administrative, e motivuar nga interesa elektorale për zgjedhjet lokale të 12 tetorit, ka tejkaluar çdo kufi të arsyes, etikës dhe përgjegjësisë njerëzore e institucionale. Kryeqyteti po ndëshkohet sepse nuk qeveriset nga strukturat qendrore të pushtetit aktual.Ne jemi dëshmitarë të një dështimi institucional dhe një kërcënimi serioz për stabilitetin dhe funksionimin demokratik të Kryeqytetit”, ka shtuar Rama.
Megjithatë, Rama ka theksuar se nuk do të lejojnë që qytetarët të penalizohen, pasi sipas tij kjo qasje nuk ndëshkon vetëm një kryetar komune, por një qytet të tërë.
“Në një situatë ku llogaria politike mbizotëron mbi interesin publik, ne mbetemi të vendosur të mbrojmë qytetarët e Kryeqytetit”, është shprehur Rama.
Ai ka njoftuar se për të tretën herë me radhë, i janë drejtuar zyrtarisht Ministrisë së Financave, Punës dhe Transfereve, me kërkesën që të veprojë në përputhje me Ligjin për ndarjet buxhetore për vitin 2025 dhe të ofrojë një zgjidhje urgjente dhe ligjore, jo të prodhojë pengesa të reja.
“Ne do të përdorim çdo mjet ligjor dhe institucional për të mbrojtur qytetarët tanë nga kjo padrejtësi flagrante dhe luftë e ulët politike. Ky nuk është vetëm detyrimi ynë institucional. Është detyrimi ynë moral”, ka thënë Rama./teve1.info/
