Një garë e ashpër zgjedhore u zhvillua të dielën për të parin e kryeqytetit.
Kryetari aktual nga Lidhja Demokratike e Kosovës (LDK), Përparim Rama, po prin me një diferencë të vogël votash ndaj kandidatit të Lëvizjes Vetëvendosje, Hajrulla Çeku. Megjithatë, mbetet të shihet nëse këto pozita do të ndryshojnë pas numërimit të votave me kusht dhe atyre të diasporës.
Një numër të konsiderueshëm votash ka marrë edhe kandidati i Partisë Demokratike të Kosovës, Uran Ismaili, por ato nuk mjaftuan për ta siguruar një vend në balotazh.
Analisti politik, Artan Muhaxhiri, e vlerëson garën në Prishtinë si shumë interesante, duke theksuar se PDK-ja ka humbur një mundësi të mirë për ta fituar kryeqytetin.
“Gara për Prishtinën ka qenë absolutisht më interesantja, sepse kandidatët kryesorë kanë pasur gjasa të barabarta. Konsideroj se është një shans i humbur për Uran Ismailin dhe PDK-në në përgjithësi, sepse kurrë më afër fitores nuk kanë qenë. Mos të harrojmë se mandati i Ramës është karakterizuar me shumë probleme dhe mos përmbushje të premtimeve”, ka thënë Muhaxheri.
Muhaxhiri ka komentuar edhe mbi balotazhin, duke thënë se tani partitë politike hyjnë në fazën e kalkulimeve për ndarjen e pushtetit.
“Gjithmonë në Prishtinë, por edhe në komunat e tjera, gjatë balotazhit dalin në pah kalkulimet politike, ndarja e pushteteve dhe interesat klanore”, ka vlerësuar ai.
Ndërkohë, gjatë ditës kandidatët për kryetar të Prishtinës janë shprehur falënderues ndaj qytetarëve për pjesëmarrjen në zgjedhje dhe për mbështetjen e dhënë.
Sipas të dhënave preliminare të Komisionit Qendror të Zgjedhjeve, në 21 komuna, gara zgjedhore përfundoi në rundin e parë, ndërsa në 17 të tjera do të zhvillohet balotazh.
